ليه بيحصل نزيف بعد عملية القلب المفتوح
السؤال ده كتير بنسمعه و بيخض المرضى بشكل كبير
لازم نبقى فاهمين إن عملية القلب المفتوح هي عملية بتتعامل مع الأوعية الدموية ، و الدم الموجود داخل القلب.وعشان نعمل جراحة لازم يكون في جرح الجرح معناه احتمال للنزيف، زي ما كلنا فاهمين وعارفين.
احنا كجراحين قلب عندنا طرق مختلفة نقدر نتحكم بيها في النظيف سواء عن طريق التقنية الجراحية المستخدمة أو عن طريق الأدوية المضادة للنزيف أيضا أعطاء الدم الفريش والبلازما كتير بيكون مصحوب بتوقف النزيف.
الحقيقة كمان انه معدل حدوث نزيف بعد القلب المفتوح ، ويكون كتير لدرجة انه يستلزم دخول العمليات مرة ثانية بيكون قليل، تقريبا من واحد إلى اثنين في المية اقصى رقم حوالي خمسة% إذا كانت الحالة معقدة .
في كمان أسباب بتزود الاحتمالات دي يعني الشاب اللي عنده 20 سنة و داخل يعمل قلب مفتوح عشان تغيير الصمام، احتمال النزيف قليل جدا، إذا كان أنظمة الجسم و أجهزة الجسم تعمل بشكل كويس، و ده مختلف تماما عن الرجل الكبير اللي عنده تسمم في الدم والتهاب في الصمام وتدهور في وظائف التجلط، او بياخذ أدوية سيولة ده بيخلي احتمالات النزيف عنده أعلى بكثير.
التقنية الجراحية الجيدة تبدأ من أول فتح جلد المريض أن يكون ما فيش نزيف ، و فتح الانسجة حتى الوصول للقلب يكون في اماكن جراحية خاصة، بيكون تقريبا ما فيهاش اوعية دموية تذكر، و بالتالي تقريبا ما فيش نزيف، لازم كمان الجراح يتاكد أن الوصلات اللي بتتعمل والجروح اللي بتتفتح، تقفل كويس جدا، ويتم التأكد من نجاح الغلق أكثر من مرة أثناء الجراحة. وبعدها كمان بنرفع ضغط الدم بشكل كبير اكثر من الطبيعي، عشان أطمن انه مش هيحصل
نزيف بعد العملية وده بنسميه بيننا كجراحين ( جراحة نظيفة) ، كلمة نظيفة بمعني المجال مكان العملية نظيف، مش متعكر بدم، وبالتالي فرص النزيف بتقل جدا، وًلا زم يكون اللي بيعمل ده ده فريق جراحي مدرب على مستوى عالي جدا
|